news-details

बायर्नले जित्दा डर्टमन्ड बराबरीमा रोकियो

जर्मन बुन्डेस लिगामा साविक विजेता बायर्न म्युनिखले कठिन जित निकाल्दा अर्को बलियो टोली बोरुसिया डर्टमन्ड भने बराबरीमा रोकिएको छ । लिग अन्तर्गत शनिबार राति भएको खेलमा बायर्नले घरेलु टोली पाडेरबर्नलाई ३–२ गोलले हरायो । डर्टमन्ड वेर्डेर ब्रेमेनसँग २–२ गोलको बराबरीमा रोकियो ।
प्रतिस्पर्धात्मक बनेको खेलमा बायर्नलाई जिताउन सर्जी जिनाब्री, फिलिप कोउटिन्हो र रोवर्ट लेवान्डोस्कीले गोल गरे । घरेलु टोलीका केइ प्रोगर र जमिलु कोलिन्सले गोल गरे । बायर्नले १५औं मिनेटमा सर्जी जिनाब्रीको गोलबाट अग्रता लिएको थियो । ५५औं मिनेटमा कोउटिन्होले गोल गर्दै बायर्नको अग्रता दोब्बर बनाए । ६८औं मिनेटमा केइ प्रोगरले गोल गर्दै घरेलु टोलीलाई खेलमा फर्काउने प्रयास गरे ।
७९औं मिनेटमा रोवर्ट लेवान्डोस्कीले गोल गर्दै बायर्नको अग्रता थप बलियो बनाए । पाडेरबर्नका जामिलु कोलिन्सले ८४औं मिनेटमा गोल गरेपनि टोलीको हार टार्न सकेनन् । जितसँगै शीर्ष स्थानमा उक्लिएको बायर्नले ६ खेलबाट १४ अंक बनाएको छ । एक अंकमा सिमित पोडेरबर्न तालिकाको अन्तिममा छ । दोस्रो स्थानको आरबी लेइपजिगको १३ अंक छ । शनिबार रातिनै भएको खेलमा लेइपजिग साल्केसँग ३–१ ले पराजित भएको थियो ।
यसैगरी अर्काे खेलमा बोरुसिया डर्टमन्डका लागि मारियो गोट्जेले नवौं र मार्काे रिउसले ४१औं मिनेटमा गोल गरे । वेर्डेर ब्रेमेनका मिलोट रासिचाले सातौं र मार्काे फ्रेइडले ५५औं मिनेटमा गोल गरेका थिए । बराबरीसँगै ११ अंक बनाएको डर्टमन्ड सातौ स्थानमा छ । सात अंक बनाएको वेर्डेर ब्रेमेन १०औं स्थानमा छ ।

 

You can share this post!


प्रतिक्रिया