news-details

दसैंको टिकट बुकिङ खुला, अनलाइनबाट पनि बुक गर्ने व्यवस्था

काठमाडौँ — दसैंका लागि आज ९आइतबार० बाट टिकट बुकिङ खुला गरिएको छ । बुकिङ खुला गर्नु अघिल्लो दिन शनिबार नयाँ बसपार्कमा यात्रु बोक्ने गाडीको प्राविधिक पक्षको चेकजाँच गरिएको छ । अघिपछि पनि शंका लागेको गाडीको कन्डिसन चेकजाँच गरेर मात्र गन्तव्यमा पठाइने यातायात व्यवस्था विभागले जनाएको छ ।

‘शंका लागेको गाडीको पहिलोपटक हामीले आकस्मिक प्राविधिक परीक्षण सुरु गरेका छौं,’ विभागका महानिर्देशक गोगनबहादुर हमालले भने, ‘यात्रु बोकेर गाडी टाढाटाढासम्म लग्नुपर्ने हुन्छ, यस्तो अवस्थामा कन्डिसनको गाडी भएन भने यात्रुले समस्या झेल्नुपर्ने हुन्छ, त्यही भएर प्राविधिक पक्ष चेक–जाँच गरेर पठाउनेछौं ।’

 

उनका अनुसार टिकट बुकिङ गौशाला, नयाँ बसपार्क, चाबहिल, कोटेश्वर, बल्खु, कलंकी, नागढुंगालगायत स्थानमा रहनेछ । जहाँ ट्राफिक प्रहरी, यातायात व्यवस्था विभागका कर्मचारी, उपभोक्ता समाजका प्रतिनिधि रहनेछन् । टिकट काट्ने क्रममा यात्रुलाई अप्ठ्यारो परेमा तत्काल नागरिक सहायता कक्षले समाधान गर्नेछ । व्यवसायीले भाडा बढाएर लिन पाउने छैनन् । अहिले जति भाडादर छ । त्यही दरमा यात्रुले गन्तव्यसम्म पुग्न पाउनेछन् । सवारी साधनको भाडा दर यात्रुले थाहा पाउने गरी व्यवसायीले गाडीमा टाँस्नुपर्नेछ । महानिर्देशक हालका अनुसार केही कम्पनीहरूले अनलाइनमार्फत पनि टिकट काट्ने व्यवस्था गरेका छन् । जसले गर्दा लाइन बस्नुपर्ने झन्झटबाट यात्रुले छुटकारा पाउनेछन् । केही यात्रुले भने बुकिङ खुला हुनुअघि टिकट बुक गरिसकेका छन् । टिकट काउन्टरमा यात्रुको भीड लाग्न सुरु भइसकेको छ ।

सहायता कक्षमा यातायात कार्यालयका कर्मचारी र ट्राफिक प्रहरी पनि हुने भएकाले उनीहरूलाई व्यवसायीबाट कुनै गल्ती भेटिए तत्कालै अधिकतम जरिवाना गर्नेसम्मको अधिकार दिइएको छ । यातायात व्यवसायीका अनुसार दसैंमा १८ देखि २० लाखसम्म यात्रु उपत्यकाबाट बाहिरिने गरेका छन् ।

यातायात व्यवसायी राष्ट्रिय महासंघका महासचिव सरोज सिटौलाका अनुसार आइतबार बिहान ७ बजेदेखि साँझ ६ बजेसम्म टिकट बुकिङ खुला रहनेछ । ‘यात्रुको चाप र आँकडा हेरेर बसको संख्या निर्धारण हुनेछ,’ उनले भने, ‘दसैंका लागि उपत्यकाबाट यात्रु बाहिरिन थाले पनि अग्रिम टिकट बुकिङ गर्नेहरू घटस्थापनाबाट जान थाल्छन् ।’ उनले सडक बिग्रिएकाले पटकपटक मर्मत गर्नुपर्ने माग राख्दै आएको बताए । ‘वर्षातका कारण ठाउँठाउँमा सडक बिग्रिएकाले त्यसलाई मर्मत नगरे यात्रु पुर्‍याउन समस्या हुन्छ,’ उनले भने, ‘यसबारे हामीले पटकपटक सम्बन्धित निकायको ध्यानाकर्षण गर्दै आएका छौं, यदि सडक मर्मत नभए यात्रुलाई दसैंमा गन्तव्यसम्म पुर्‍याउन असमर्थ हुनेछौं ।’

अनलाइनबाट पनि बुकिङ
यात्रुले पहिलाजस्तो अहिले लाइन लागेरै टिकट काट्नुपर्ने अवस्था छैन । विभिन्न अनलाइनमार्फत घरमै बसेर टिकट बुकिङ गर्न सक्ने छन् । अनलाइनमा गाडी भाडादर ठाउँअनुसार राखिएको छ ।

bussewa.com

westnepalbus.com

You can share this post!


प्रतिक्रिया