ट्रेण्डिङ
उपन्यास 'मृत्युको आयु' बजारमा
काठमाडौं - जनस्वास्थ्यविज्ञ तथा लघुकथा लेखक रवीन्द्र समीरको नयाँ कृति 'मृत्युको आयु' बजारमा आएको छ। वैदेशिक रोजगारीका लागि खाडी मुलक पुगेका एक व्यक्तिको मृत्युपश्चात् उक्त व्यक्तिको आत्माको दृष्टिकोणबाट लेखिएको कृतिले वैदैशिक रोजगारीमा जानेहरूको कारूणिक कहरलाई काल्पनिक भाषामा प्रस्तुत गरेको छ।
कृतिमा संरचनात्मक नयाँपनको खोजी पनि छ। लघुकथाका रुपमा पढ्न सकिने स-साना कथालाई उनेर लेखकले उपन्यास बनाएका छन्। कृतिबारे बोल्दै आख्यानकार नयनराज पाण्डेले भनेका छन्, 'एउटा खास किसिमको फर्म्याटमा आइरहेको नेपाली आख्यान क्षेत्रमा 'मृत्युको आयु' फरक खालको कथावाचन शैलीमा प्रस्तुत भएको छ,' उनले थपे, 'रेमिट्यान्सका भरमा टिकिरहेको नेपाली अर्थतन्त्र र त्यसले व्यक्ति, परिवार र समाजमा पारिरहेको भयावह प्रभावको सशक्त एवम् मार्मिक चित्रणले उपन्यासलाई समकालीन समस्यासित जोड्छ। ब्ल्याक ह्युमरको प्रयोग यो सूत्र उपन्यासको अर्को बलियो पक्ष हो।'
स्वैरकाल्पनिक शैलीमा लेखिएको यो उपन्यास चोटिलो र मर्मस्पर्शी रहेको आख्यानकार अमर न्यौपानेले बताए। भने, 'खाडी मुलकबाट वार्षिक सयौंको सङ्ख्यामा रातो बाकस नेपाल आउँछन्। ती बाकसमा उनीहरूको जीवनसँगै सपना र रहर पनि मृत भएर आउँछन्। यस्ता थुप्रै राता बाकसको प्रतिनिधित्व गर्ने एउटा रातो बाकसको कथा नै मृत्युको आयु हो।'
त्यस्तै लेखक तथा व्यवसायी जीवा लामिछानेले वैदेशिक रोजगारीमा गएर आकस्मिक मृत्युवरण गर्नेहरूको दारुणिक कथा 'मृत्युको आयु' भएको बताए। भने, 'मृतकको आत्माले कहेको यो कथा मार्मिक र अझ बढी पीडादायी छ!' उपन्यासबारे बोल्दै लेखक समीरले भने, 'लघुकथालाई बुनेर उपन्यास बनाउने प्रयोग मैले यस कृतिमा गरेको छु। यसका एक सय ६६ लघुकथा आफैंमा स्वतन्त्र छन्। यिनबाट बनेको सिक्री उपन्यास पनि आफैंमा स्वतन्त्र छ, फूल र माला जस्तै।'
समीरका आठ वटा लघुकथा सङ्ग्रह, एकएक वटा मुस्तक सङ्ग्रह, नियात्रा सङ्ग्रह र संस्मरण प्रकाशित छन्। 'मृत्युको आयु' उनको बाह्रौं साहित्यिक कृति हो। उनले पद्मश्री साहित्य पुरस्कार, उत्तमशान्ति पुरस्कार, युवा वर्ष मोती पुरस्कार, अनेसास उत्कृष्ट पुरस्कारलयायत थुप्रै राष्ट्रिय तथा अन्तर्राष्ट्रिय पुरस्कार एवम् सम्मान प्राप्त गरेका छन्। पुस्तक फाइनप्रिन्टले प्रकाशन गरेको हो।
सम्बन्धित शिर्षक
ताजा अपडेट
प्रतिक्रिया